Aron pagresponde sa outbreak sa African Swine Fever (ASF) nga natala na sa siyudad sa Iligan nga silingan lang kaayo probinsya sa Misamis Oriental, gipangandaman sa mga miyembro sa Provincial Task Force On the Prevention And Control of Animal Diseases (PCAD) nga gipangunahan ni Governor Bambi Emano, ang posibleng pagsulod sa maong sakit sa baboy dinhi sa lalawigan.
Usa ka emergency meeting ang gipahigayon bag-ahoy pa lamang aron mas panghingusgan pa ang pagpangandam sa pakigbatok sa ASF. Gihisgotan ang kasamtangang sitwasyon sa siyudad sa Iligan, partikular sa Brgy. Pugaan kon asa maoy sentro sa outbreak sa makapatay nga sakit sa sa baboy.
Hugot kining gibantayan sa lalawigan kay tapad lamang kini sa Brgy. Betahon, lungsod sa Lugait.
Human sab nasayran ni Governor Bambi ang report kalabot sa outbreak sa silingang siyudad niadtong adlawng Sabado nipagawas kini og executive order nagmando nga i-ban usa ang mga pork products gikan sa Iligan ug mga lugar nga makaagi sa siyudad sa Iligan.
Sa quarantine checkpoint sa Lugait pa lang daan pabalikon na ug dili na pasudlon ang mga nagdala og baboy. Gidoble sab ang pagsusi sa mga pork products nga gipangproseso sama sa chorizo, chicharon ug uban pa.
Dugang nahisgutan sa emergency meeting nga gitambungan nila ni Sangguniang Panlalawigan Member ug Chairman sa Committee on Agriculture Hon. Frederick Khu ug Provincial Veterinarian Dr. Benjamin Resma ang pagpalihok sa Incident Command System ug Contingency Planning kon ugali man masudlan ang probinsya.
Gikinahanglan ang team alang sa depopulation procedures o ang pagpatay sa mga baboy nga mataptan sa ASF. Gihatagan sab og tahas ug responsibilidad ang matag komitiba aron insaktong maplanohan ang mga lakang kon masudlan sa ASF ang probinsya.
Isip chairman sa PCAD Task Force, gipaniguro ni Gobernador Bambi Emano nga ang MisOr nagpabilin ug magpabiling ‘one step ahead’ batok ASF, rason nga hangtod karun, ASF-free pa gihapon ang lalawigan o anaa gihapon sa green zone nga nagpasabot luwas ang mga karneng baboy nga kaunon, ipagawas o isuplay ngadto sa nagkalain-laing dapit sa nasod.
(Provincial Information Office)