Cebu City – Naospital ang drayber ug iyang pahinante sa pagka hagbong sa gisakyan nilang mini dump truck sa sityo Dita, Brgy. Pulangbato, Dakbayan sa Sugbo, alas 9:00 pasado gahapon sa buntag.
Ang kapolisan mibanabana nga ang pangpang nga nahulgan adunay giladmong 20 ka tiiil ug sapa sa ubos. Si Capt. Jonathan Taneo, hepe sa kapolisan sa Talamban o Station 8 sa CCPO, miila sa drayber nga si Emelech Kendrick Enriquez, 24, nga mulupyo sa Brgy. Guba ug sa truck boy nga si Rey Carlo Reuyan, 19, nga nagpuyo sa Brgy. Lanipga, Consolacion.
Nakita sa imbestigasyon sa kapolisan nga ang mini dump truck gikang naghakot og balas sa quarry site duol sa nahitaboan nga dad-on unta sa Brgy. Guba.
Suma pa ni Taneo, wala panumbalinga ni Enriquez ang kagamay sa karsada ug dihang paingon na unta siyang moliko nagbitay na ang pikas ligid sa pangpang hinungdan sa ilang pagkahagbong.
Si Reuyan nga naglingkod sa front seat sa dump truck wala na makagawas dihang nahulog ang sakyanan.
Gawas sa kahagip-ot sa dan, nagtuo ang kapolisan nahug ang trak tungod sa kadangog sa karsada gumikan sa pagpunay og uwan.
Sila si Enrique ug Reuyan nga nakaangkon og mga bun-og ug samad giatiman dayon sa QRT o Quick Response Team sa barangay ug gihatod sa tambalanan.
(Jhon Tadlip/ JTY, photo courtesy of Pulangbato QRT)
(Source: CCDRRMO)