Cagayan de Oro City – Hangtud dili pa makab-ot ang hingpit nga pagkunhod sa kaso sa COVID-19 sa syudad sa Cagayan de Oro, epektibo pa gihapon ang pagpatuman sa curfew hours, matud pa ni Mayor Oscar Moreno. Mao kini ang iyang tubag sa sulat hangyo sa economic group labot na sa pagpaluag sa curfew dinhi sa syudad diin sumala pa sa Mayor atol sa usa ka press briefing nga kontratiyempo ang maong hangyo tungod sa taas pa nga local cases.
Base sa record sa miaging semana nga gibutyag ni City Health Officer Dr. Lorraine Nery nga ang Cdeo adunay 1,096 cumulative COVID-19 cases nga adunay 48 ang patay ug 699 ang nakarecover.
Sa gidaghanon nga 1,096 ka kaso, 341 ang returning kagay-anons o 31.11% samtang ang local cases anaa sa 755 o 68.88%
Tugtan man tuod ang mga seniors ug kabataan sa paggawas sa panimalay ug pagsulod sa mga malls apan kon kini alang sa pagpalig-on sa ekonomiya prayoridad pa gihapon ang panglawas sa publiko. Si Moreno nag-awhag nga magpugong sa una sa kaugalingon ug magtinabangay sa pagpakunhod sa COVID-19 cases pinaagi sa strikto nga pagcomply sa minimum health protocols. (City Information Office)