Cebu City- Gipatuman na sa Kapitolyo ang hugot nga pag-screen sa mga tawong manud sa edipisyo sugod kagahapon aron dili makalusot kadtong naghambin og hilanat ug ubang timailhan sa Covid 19.
Gani, sa dili ka pa makasud sa ganghaan, tan-awon una sa guwardiya ang imong temperatura.
Kadtong mga tawo nga adunay kainiton nga lapas sa 38 ka degree Celsius, dili na lang mopadayon sa ilang katuyoan sa mga buhatan sa Kapitolyo.
Sumala pa sa provincial health officer, Dr. Christina Giango, gimandoan sila ni Gob. Gwen Garcia nga himoong protocol ang paghiling sa panglawas sa mga mosulod sa Capitol building.
Ang susamang protocol gipatuman usab sa mga kawani sa kagamhanang probinsiyal.
Gitambagan ni Giango ang mga empleyado nga kon aduna kiniy hilanat, ubo ug sip-on mas maayong magpabilin na lang sa balay o kon molakaw man magsul-ob gyod og face mask.
Sa pikas bahin, ang ubang guwardiya sa Kapitolyo nagsul-ob na og protective mask isip precautionary measure batok sa coronavirus disease.