Kapin 30 ka mga recovering responders ubos sa Community-Based Drug Rehabilitation Program (CBDRP) ug mga Community-Based Managers (CBMs) ang mipailawom sa Basic Life Support training nga kabahin sa mga kalihokan alayon sa kasaulogan sa Drug Abuse Prevention & Control (DAPC) Month.
Ang duha ka adlaw nga kalihokan gipahigayon adlaw’ng Lunes ug Martes Nob. 13-14, diha sa Patrick Cronin Hall, St. Agustine Cathedral nga gipasiugdahan sa City Anti-Drug Abuse Council (CADAC) pinaagi sa CADAC Division- Oro Wellness Center, Department of Interior and Local Government (DILG).
Mga personahi sa Urban Search and Rescue (USAR) sa City Disaster Risk Reduction and Management Department (CDRRMD) ang mihatag sa lecture, disaster preparedness, ug hands only cardiopulmonary resuscitation (CPR) ngadto sa mga partisipante.
Samtang, naglaum ang CADAC sa administrasyon ni Mayor Rolando `Klarex’ Uy nga pinaagi niini mahatagan og kahibalo ingon man kapasidad ang mga partisipante diin ma-apply nila panahon sa emerhensiya dili lang sa ilang panimalay apan sa ilang barangay.
Si Dr. Rhyselle Bernadette Melliza-Descallar, head sa CADAC Division-Oro Wellness, mibutyag nga laing batch na usab sa recovering responders ug CBMs ang mopailawom sa susamang pagbansay sugod karong adlawa Nob. 15-16.
News and photo courtesy of CIO CDO