Cebu City – Misulbong pa ngadto sa kapin sa 18 mil ang ihap sa mga pasyente nga naulian sa coronavirus disease o COVID-19 sa Central Visayas tungod sa nadugang nga kapin sa 200 sa case bulletin pinitsahan ug Septembre 29, 2020.
Segun sa gipagawas nga report sa Department of Health o DOH-7, ang 232 nga uwahing naayo gilangkoan sa 62 sa Cebu province; 15 sa Cebu City; 36 sa Mandaue City; ug 13 sa Lapulapu City.
Tungod niini, miabot na ang tanang naulian sa rehiyon og 18,165.
Ang mga bag-ong naka recover sa pasyente sa Bohol miabot ug 106, samtang ang Siquijor way bag-ong natalang recovery sa labing uwahing case bulletin.
Ang 232 ka uwahing naulian ang labing daghan sa milabayng usa ka semana.
Sa pikas bahin, mireport ang DOH 7 og minos nga ihap sa bag-ong kaso sa Covid 19 sa rehiyon nga miabot lang og 23.
Ang uwahing mga gi-covid gisakpan sa 14 sa Cebu province, upat sa Cebu City, usa sa Lapu-Lapu City, upat sa Mandaue City, ug way bag-ong kaso sa Bohol.
Kini ang ikalima ka adlaw nga mitala og single digit additional cases ang siyudad sa Sugbo.
Napun-an og usa ang gidaghanon sa mga patay sa COVID-19 sa rehiyon ug kini gikan sa Lapu-Lapu City. (Jhon Tadlip/ JTY)
(Source: DOH Central Visayas Center for Development Health)