Cebu City – Patay ang usa ka edarang babaye nga naapil pagkasunog sa iyang balay sa Lower Sacsac, Brgy. Abucayan, Balamban, Cebu sa miaging hapon.
Nailhan ang biktima nga si Estelita Deiparine, 71 anyos, nga wa na makagawas sa lawak sa pagdilaab sa iyang balay.
Si S/Sgt. Excel Aguanta miingon nga si Deiparine nga usa ka bakolĀ nag-inusara lang sa balay dihang kini nasunog.
Matod ni Aguanta, 45 anyos nga anak sa namatay nga si Ā Chona Completo mitug-an nga iyang gidagkotan og katol ang inahan sa wa pa mobiya sa balay nianang alas 5:40 sa hapon.
Suma pa ni Aguanta, si Deparine nga dugay nang nabiyuda pagaduawon lang ni Completo aron pagsusi sa kahimtang ug binlan og katol sa dili pa molakaw aron dili lamokon sa kuwarto ang tiguwang.
Nagtuo si Aguanta nga ang katol ang nakaingon sa sunog dihang ang baga midakop sa daling mosiga nga butang sa lawak ni Deiparine.
Midugang ang polis nga nahibaw-an na lang niĀ Completo ang nahitabo sa balay sa iyang mama dihangĀ misinggit na ang mga silingan og tabang.
Ang kabomberohan mibanabana sa danyos sa sunog ngadto sa ā± 100, 000.00.
(Jhon Tadlip/ JTY)
(Source : Municipality of Balamban Police Station)