Cebu City – Gihangop ni Lapu-Lapu City Mayor Junard “Ahong” Chan ang Resolution no. 113 sa national IATF o Inter-Agency Task Force nga nagtugot sa mga langyaw pagsud sa nasod sanglit nangandam na ang siyudad niini.
Base sa resolusyon sa IATF, gitugot ang pagsud sa mga langyaw basta naghupot og balidong visa, pre-booked accommodation sa labing minos pito ka gabii, ug Covid-19 testing sa quarantine hotel/facility sa ikaunom nga adlaw gikan sa petsa sa pag-abot.
Gidaygan ni Chan ang mga tigbalita nga mahimong makasud sa Lapu-Lapu ang mga langyaw basta hingpit na silang nabakunahan ug sud sa 72 oras sa dili pa sa ilang flight, kinahanglang negatibo sila sa RT-PCR test.
Matod ni Chan, kon ang nabakunahang langyaw wala moagi sa RT-PCR test sa wala pa mogikan, i-test sa tugpahanan.
Suma pa sa mayor, sama sa baroganan ni Gob. Gwen Garcia, ang mga Filipino workers nga nagpuyo sa gawas sa nasod nga buot mopauli aron moduaw sa ilang pamilya ug mobakasyon, mahimong makapauli kon negatibo ang resulta sa swab test.
Midugang si Chan nga ang vaccinated foreign nationals nga negatibo sa RT-PCR test welcome sa Lapu-Lapu. (Jhon Tadlip/JTY)
(Source: Lapu-Lapu City Public Information Office, photo courtesy of MCIAA)