Cebu City – Gipahibawo ni Mayor Edgardo Labella sa dakbayan sa Sugbo ang gitakdang paglibkas sa liquor ban sugod karong Biyernes, Mayo 7, 2021.
Gipasabot ni Labella nga nakadawat siyag rekomendasyon gikan sa EOC ug sa kadagkoan sa panglawas paglibkas sa liquor ban ug aduna pa gyoy request gikan sa CCCI o Cebu Chamber of Commerce and Industry aron pagbuhi sa ekonomiya ilabina sa mga restaurants.
Buot ni Labella nga moluwat og bag-ong Executive Order (EO) karong Biyernes nga maglatid sa guidelines sa pagpamaligya ug pag-apod-apod sa ilimnong makahubog taliwa sa gipatumang health protocols.
Kini naglakip sa pagpakatap og marshals gikan sa Emergency Operations Center aron mabantayan ang mga establisimento nga dili motuman sa minimum health standards.
Gipasidan-an usab sa mayor ang mga kan-anan ug bar nga nagdalit og bino nga ang paglibkas sa ban wala magpasabot nga gipapas na ang health protocols sama sa social distancing, paglimit sa gidaghanon sa mga customer ug gidaghanon sa ilimnong i-serve.
Sa nasayran, gi-ban ang inom-inom sa dakbayan niadtong Pebrero dihang misulbong ang mga kaso sa COVID-19. (Jhon Tadlip/JTY)
(Source: Cebu City Public Information Office)