Cebu City – Katorse ka mga mayor ug ubang key officials sa Sugbo ang gitakdang motambong sa PDP-Laban national council meeting, Mayo 31, 2021, bisan pa man sa na unang memorandum nga giluwatan sa party president, Senador Manny Pacquiao nga nagdili sa mga membro pagtambong sa maong kalihukan.
Gibutyag ni PDP-Laban Cebu President Nixon Dizon nga madayon ang meeting uban sa Party Chairman nga si President Rodrigo Duterte, pinaagi sa Zoom, ug ipresenta ang iyang mga nabuhat.
Kadtong maka tambong physically sa Sugbo mag abot sa Montebello Villa Hotel.
Lakip nga motambong si Office of the Presidential Assistant for the Visayas (OPAV) Secretary Michael Lloyd Dino, Governor Gwendolyn Garcia, Kongresista Emmarie Ouano-Dizon sa Sixth District.
Gitakda sab nga motambong sa assembly online ang mga membro nga taga Luzon ug Mindanao.
Bisan pa man sa na unang memorandum sa PDP-Laban Party President, Senador Manny Pacquiao nga nag awhag sa mga membro sa dili pagtambong sa maong assembly, matod nga Dizon nga duna kini pagtugot sa Party Chairman nga si PRRD.
Si Pacquiao maoy nagsilbing interim president sa partido nga gitudlo sa kanhi party chairman, former Senator Koko Pimentel.
Niadtong Mayo 25, 2021, miluwat si Pacquiao ug memo nga nanawagan sa mga membro nga ibaliwala ang suwat sa vice-chairman sa grupo nga si Alfonso Cusi.
“Said invitation is not sanctioned by authorized National Council officials and violates Section 4 and Section 5, Article XVI, Constitution of the PDP Laban. Any call for a national council, assembly or meeting must be approved by both the Chairman and the President only,” unod sa memo ni Pacquiao.
Alang sa senador nga dili ron panahon sa pamolitika; angayan karon pagtabang sa nasud sa nahimong epekto sa COVID-19 pandemic.
Nagdumili hinoon sa pagluwat ug komento si Cusi sa memo sa Senador.
Gawas sa report ni Duterte, naglakip sa agenda nga naka butang sa imbitasyon ni Cusi ang mahitungod sa consultation sa mga “incumbent elected party members” labot management sa pandemic ug “Administrative Matters in Preparation for the 2022 National Elections.
Sa pamahayag ni Dizon kagahapon, matod niini nga wala pa siya masayod kung ang partido mopahibaw na ba ug si kinsa ang suportahan sa pagka presidente ug pagka bise presidente sa sunod tuig nga piniliay.
Sa iyang bahin, si Kanhi Cebu City Mayor Tomas Osmena nihulagway sa maong tigom nga insulto sa mga Pilipino ang pagpahigayon sa assembly dinhi sa Sugbo alang sa kandidato nga taga Davao.
(Jhon Tadlip/JTY)
(News & photo courtesy of: PDP-Laban Cebu)
