Umabot iti innem a pulo ket uppat a barangay ti nakakumpleto pay laeng ti dokumentoda para iti pannakaipasdek barangay eco-tourism park iti bukudda a lugar.
Mainaig iti daytoy, imbatad ni Mrs. Aleth Claire Policarpio, mangidadaulo ti Office of Barangay Affairs a dagitoy dagiti barangay a mannarimaan ti pannakaiproseso ti pannakaparuk-at ti pundo para kadagiti nasao a proyekto.
Imbatadna nga iti agdama ket addan ti agarup tallo gasut a barangay a nagisubmitir ti kiddawda para iti pannakaipasdek ti maiyasping a proyekto iti bukudda a lugar.
Inlawlawagna nga adda posibilidad a saan nga amin a barangay ditoy probinsia ket makaiyestablisar iti nadakamat a kangrunaan a proyekto ni Gob. Matthew Marcos Manotoc ita a tawen nangnangruna kadagiti adda iti uneg ti poblasion gapu ta awan ti lote a mabalin a pakaipatakderan ti parke.
Maipalagip nga inrakurak ni Gob. Manotoc itay kallabes a masapul a ti nasao a parke ket addaan iti bassit a namulaan ti natnateng, addaan ti composting ken ti parke a mabalin a pagay-ayaman, pag-ehersisyoan ken pagliwliwaan.
Impalgakna a dagiti dadduma ket adda ti nabigbigda a lote ngem awan pay ti maipakitada a pagbasaran a kukua ti barangay ti nasao a daga rason a saanda a makapagkiddaw ti para iti pannakapasayaat ti nasao a lugar.
Immun-una ngem iti daytoy, inpakaammo ti gobernador nga adda ti maipaay a dua gasut a ribu a pisos a pundo para iti tunggal barangay ditoy probinsia para iti pannakaiyestablisar ti nasao a proyekto.
(Erica Jeanine Yere, RPN DZRL Batac Correspondent)
(Source: Provincial Government of Ilocos Norte, photo courtesy of Batac City government)