Mga Illegal Structures Midaghan Sa Brgy. Lorega San Miguel, Cebu City

Niadtong Miyerkules sa hapon November 14, mokabat sa trayenta ka mga pinuy-anan ang naugdaw sa sunog nga misangpot sa kamatayopn sa usa ka lalaki. Gibutyag ni Teofilo Ramos, 48 anyos ug residente sa Barangay Lorega-San Miguel, nabalaka sila nga mahitabo ang laing trahedya kon aduna’y sunog sa ilang lugar gumikan sa hagip-ot na nga karsada.

Matud ni Ramos nga nababagan na ang karsada paingon sa sudlonon nga bahin sa Barangay Lorega-San Miguel tungod sa gipangtukod nga mga illegal structures.

Niadtong nakalabay nga administrasyon, gipatuman sa Cebu City government ang reblocking sheme sa Barangay Lorega-San Miguel gumikan sa sunod-sunod nga mga sunog sa maong barangay.

Ang reblocking scheme gitumong aron sayon makaagi ang mga fire trucks kon aduna’y sunog. Gibuksan ang 6 metros nga karsada alang sa main road  ug 3 metros nga mga interior roads.

Apan ang mga residente sa daplin sa bag-ong mga karsada, mipalapad na sa ilang mga pinuy-anan ug mitukod pa gyod og mga tindahan ug ubang commercial establishments nga  naglakip na sa mga STL Outlets. 

Nasayran nga misangko na sa buhatan ni Cebu City Mayor Tomas Osmena ang maong problema. Makaduha na ka higayon nga gisusi  sa pangulo sa Cebu City Demolition Team, Raquel Arce ang nahimutangan sa mga illegal strucutres apan nagpabilin gihapon ang maong mga illegal structures, sumala pa ni Ramos.

Samtang, gipasalig sa Cebu City government nga hatagan sa financial assistance ang pamilya sa namatay atol sa sunog nga si Amado Maglinte, 52 anyos ug ang mga survivors.