Cagayan de Oro City- Usa ka army battalion nga nag-operar sa probinsya sa Misamis Oriental ang mipasidungog kang Misamis Oriental Gov. Yevgeny “Bambi” Emano usa ka plaque of recognition tungod sa iyang way pagkatapusan nga suporta sa pagpakigbisog sa military batok sa terorismo ug insurhensya.
Ang 58th Infantry Battalion sa Philippine Army mitunol sa maong plaque ngadto sa gobernador atol sa ilang 33rd anniversary nga gihimo sa lungsod sa Claveria niini nga probinsya.
Suma pa sa military, ang maong pasidungog gitunol tungod sa dedikasyon ug suporta ngadto sa gobernador aron masiguro ang seguridad, kalinaw ug pagpatunhay sa kahapsay sa palibot.
Mga tag-as nga opisyal sa 4th Infantry Division, 403rd Infantry Brigade, anti-narcotics agency sa Northern Midanao ug mga opisyal sa Gingoog City ug Phividec Industrial Estate ang mitambong sa selebrasyon.
Si 58th IB commanding officer Lieutenant Colonel Roy Anthony Derilo nag-ingon nga dako kaayog natabang ang gobernador sa kalampusan sa mga kalihokan sa battalion ilabi na sa paghatud sa mga kalambuan sa kabukiran.