Gipahibawo sa buhatang rehiyonal sa panglawas nga ang mga healthcare workers sa VSMMC o Vicente Sotto Memorial Medical Center ang unang bakunahan aron mapanalipdan batok sa coronavirus disease.
Gitakdang moabot ang mga bakuna karong Pebrero 15, o sa katapusang semana ning buwana.
Atol sa virtual press conference, si Dr. Mary Jean Loreche, tigpamabasa DOH-7, miingon nga ang VSMMC ang bugtong ospital nga napili isip unang COVID-19 vaccination center sa Central Visayas.
Base sa data nga nakuha gikan sa VSMMC, si Loreche mipahibawo nga ang tambalanan adunay 2,987 ka frontline healthcare workers.
Midugang si Loreche nga sa maong gidaghanon, 2,480 ang misugot nabakunahan.
Sa nasayran, ang mga healthcare workers lakip sa priority list sa gobyerno sa COVID-19 inoculation program, uban sa mga senior citizens, indigents, ug uniformed personnel.
Hinuon, matod ni Loreche, nagpaabot pa sila og dugang instructions gikan sa ilang labaw labot sa vaccination program. (Jhon Tadlip/JTY)
(Source: DOH-7, photo courtesy of VSMMC Facebook page)