Nalipay karon ang mga kwalipikadong health worker sa entiro probinsya sa Sarangani tungod sa risk allowance ug additional hazard pay nga ihatag kanila sa pamunuan ni Pangulong Rodrigo Duterte alang sa ilang pagsakripisyo ug pag-atiman direkta sa mga pasyente nga gipang-COVID.
Niaging adlaw nga Martes, atol sa sesyon sa Sangguniang Panlalawigan sa Kapitolyo sa Sarangani, gitagaan og pagtugot si Governor Steve Chiongbian Solon nga pirmahan ang kasabutan tali kaniya ug ni DOH 12 Regional Director Doctor Aristides Tan alang sa maong ayudang pinansyal gikan sa nasyonal nga gobyerno gitawag nga SRA kon Special Risk Allowance ug AHDP o Active Hazard Duty Pay. Matag bulan, Singko Mil ka pesos (₱ 5K) ang makuha sa SRA, Tres Mil (₱ 3K) usab sa AHDP, sulod kana sa tulo (3) ka bulan.
Maka-benipisyo ang mga kwalipikadong public health worker nga na-assign sa mga COVID-19 facility, hospital, health office ug laboratoryo kangsa gaatiman sa mga COVID-19 patient gikan bulan sa Setyembre hangtud karong bulan sa Disyembre. Lakip matagaan ang mga trabahante sa pribadong pasilidad alang sa special risk allowance. Pwede usab maka-benipisyo ang mga barangay health worker human ma-rekomenda sa municipal health office.
Sayod man ang tanan unsa ka-risgo sa mga health frontliner ang ilang mga kalihukan sa pag-atubang sa makatakod ug makamatay nga Coronavirus nga siyam (9) ka bulan napud nga ginalabanan sa mga katawhan dili lang sa Pilipinas kundili sa tibuok kalibutan.
Giduso ang resolusyon paghatag og katungod kang Governor Solon nga pirmahan ang Memorandum of Agreement pinaagi ni Board Member Irish Arnado, ang chairwoman sa SP Committee on Health, ug suportado kini ni Vice Governor Elmer De Peralta, tanang board members ug mga mayores, apil na sila Senador Manny ug Congressman Ruel Pacquiao.
Sa pikas nga bahin, aprobado na usab sa sesyon ang paghatag og pondo gikan sa Kapitolyo sa Sarangani balor og Three Hundred Thousand Pesos (₱ 300K) para sa munisipyo sa Glan. Kabahin kini sa padayong programa sa opisina ni Dr. Arvin Alejandro sa Provincial Health Office nga Zero Open Defecation o ZOD aron ang tanang panimalay sa Sarangani ang makaangkon og pansayan kon comfort room ug mga septic tank sa kabarangayan. Giduso ang resolusyon ni Board Member Joseph Calanao, chairman sa SP Committee on Legal Matters.
Samtang, aprobado pud sa maong sesyon ang pagtugot nga pirmahan ni Governor Solon ang Deed of Donation and Acceptance tali sa inila nga Zuellig Family Foundation naka-basi sa Metro Manila pinaagi sa ilang executive director ug kanhing DILG undersecretary nga si Austere Panadero.
Muhatag ang Zuellig Family Foundation og linibo kabuok assorted personal protective equipment ug mga tambal-bitamina sa Provincial Government sa Sarangani aron magamit sa mga frontliner ug indibidwal sa padayong pakigbugno sa Coronavirus. Mukantidad kini og halos Tunga sa Milyon ka pesos (<₱ 500K), gilangkuban sa N95 masks, safety googles, coveralls, shoe covers, surgical gloves, surgical masks, portable infrared forehead thermometer, Azithromycin ug Vitamin C with Zinc. (Provincial Information Office – Sarangani)