Giila sa mga opisyales sa probinsya sa Sarangani ang sakripisyo, paningkamot ug adlaw-adlaw nga paglihok sa tanang frontliner dili lang sa probinsya sa Sarangani kundili sa tibuok Pilipinas ug sa entiro kalibutan. Gipahinungod sa Sarangani ang National Heroes Day ngadto kanila. Sila ang mga bayani sa kasamtangang panahon nga nitugyan sa ilang kinabuhi taliwala sa risgo nga matakdan sa nagpadayon karon nga Coronavirus world-wide outbreak.
Sa Provincial Government sa Sarangani, nagpabilin ang direktiba ni Governor Steve Chiongbian Solon ngadto nila Assistant Provincial Administrator for Operation Engineer Gerald Faciol, Provincial Health Officer Doctor Arvin Alejandro ug sa tibuok pwersa sa LFC kon Local Finance Committee, nga padayong mamalit og mga PPE kon personal protective equipment suit aron dili mag-recycle og mga kagamitan nga ginasuot sa mga medical frontliner alang sa ilang kalusawan sa pag-atubang sa mga nag-positibo sa COVID-19.
Apil na dinhi ang mga personahe sa PDRRMO Sarangani sa opisina ni Mr. Rene Punzalan nga padayong ma-proteksyunan samtang nagasundo sa mga LSI/locally stranded individual ug Returning OFW sa bisan asang parte sa Mindanao ma-airport man o pantalan.
Padayon usab ang pag-training sa mga doctor, med tech, nurses ug uban pang personahe sa municipal-provincial hospital ug sa municipal-provincial health office aron masiguro ang saktong pagdala o handling sa mga swab sample sulod sa laboratory room ug mapatuman ang uban pang kamanduan sa Department of Health ug sa World Health Organization. Una ng gikabalita nga adunay mga medical frontliner ang natakbuyan og Coronavirus sa Polomolok, South Cotabato ug sa dakbayan sa Heneral Santos.
Samtang, ang ilang hazard pay ang na-pondohan na usab. May naghulat pud nga kaayuhan alang sa mga barangay health workers, barangay nutrition scholars ug uban pang health workers sa tibuok Sarangani Province gumikan sila na ang kaabag sa LGU sa pagsugod pa lang sa Coronavirus pandemic gikan atong bulan sa Marso, lima (5) ka bulan na nga pagkumbate.
Bisan ang provincial veterinarian sa Sarangani nga si Doctor Bernard Cababat ang mapasalamaton sa pamunuan nila Governor Solon, Vice Governor Elmer De Peralta, mga board member ug sa mga mayor tungod sa pag-ayuda sa ilang mga kalihukan kay dili lang man Coronavirus ang ginabantayan sa mga frontline worker kundili ang nagpadayon karon nga pagpugong nga dili masusama ang Sarangani sa ubang lugar nga daghan ng mga area ang naigo ug gipamatay ang mga baboy gumikan sa ASF o African Swine Fever.
Sa bahin sa kapulisan ug kasundaluhan, padayon silang gisaluduhan sa mga LGU official. Gani, anaa nitambong sila Senador Manny Pacquiao, Governor Solon, Vice Governor De Peralta ug mga mayor, sa pagsuporta ni Congressman Ruel Pacquiao, sa ika-katorse (14th) katuig nga anibersaryo sa 1002nd Brigade Philippine Army sa Pulutana, Malungon atong adlaw nga Byernes, Agosto 28.
Walay laing mensahe ang mga frontliner kundili padayong tumanon ang mga pahimangno sa gobyerno. Dili na lang mugawas sa balay kung walay importanteng tuyo gumikan nideklara na karon ang pipila ka hospital sa Gensan nga dili usa sila manawat og pasyente tungod puno na ang ilang mga kwarto.
Kagabii, gideklara pud ang temporary shutdown sa Market 1, Market 2 ug Market 3 sa Gensan Fishport magsugod Setyembre 2 hangtud sa upat (4) ka adlaw nga pwedeng ma-extend kung gikinahanglan. I-disinfect ang Gensan Fishport ug mag-contact tracing human nga adunay mga natakdan sa Coronavirus nga may exposure sulod sa maong pasilid.
(Sarangani Public Information Office)