Taghangyo kuman hapon ni Vice Governor Eddie “Geed” Gokiangkee Jr. an Provincial Information Center na kolektahon an tanan Executive Orders sa Syudad sa Surigao sanan Kalungsuran ug palapdan an pagpasabot sama sa Binisaya o Surigaonon aron masabtan sa yanong lungsuranon.
Kini tungod kay sugod kuman Nobyembre 16, 2020 abli na an border sa Surigao del Norte apan jaoy mga munisipyo lakip an syudad na estrikto pa sa mga mosuyod nga gikan sa mga lugar na jaoy local transmission sa CoViD-19.
An session kuman hapon sa Sangguniang Panlalawigan naghisgot bahin sa restrictions nga luag na sa probinsiya apan pag-abot sa syudad dili pa.
Sumala pa ni Board Member Melva Garcia maradjaw ini na lakang kay sa idja nabati buntag sa interview nan RPN DXKS kan Kag. Jex Bayana, tagpaklaro na kon an mga Surigaonon mokadto sa SM City Butuan na bag-o pa tag-ablihan, inigbalik pagsuyod sa syudad i-kwarantina suyod sa 14 diyas.
Dugang pa isab ni Vice Governor Gokiangkee hamok an waya makasabot sa mga kamanduan. An syudad sa Surigao waya gihapon magkumpiyansa sa pag-abli nan border sa Surigao del Norte. Nasayran kan Kagawad Bayana nga an Butuan City jaoy lamang 3.6% mortality rate sa mga confirmed CoViD-19 cases ikumpara sa Surigao City nga taas an mortality rate na 13% basi sa data na tagpagawas sa City Health Office.
An pagkwarantina sa mga LSIs sanan ROFs pwede na sa hotel o sa BIUs samtang jaoy pwede sa home quarantine basi sa protocol sa City Health Office sama sa mga recovered patients nga gikan sa Cebu o sa gawas sa Surigao del Norte.
(Jhino Parrucho, Ronda 10 RPN DXKS Surigao)