Cebu City – Nakatala ang Department of Health o DOH-7 og gamayng pagsaka sa gidaghanon sa mga nabuthan sa milabayng pagsaulog sa Pasko taliwa sa hulga sa coronavirus disease o COVID-19 pandemic.
Si Dr. Mary Jean Loreche, tigpamaba sa DOH-7 misulti sa media pinaagi sa teks nga hangtod niadtong Sabado nakatala silag unom ka biktima sa pabuto.
Hinuon, walay nakalas sa mga biktima ug wala usay naigo sa saag nga bala.
Matod ni Loreche, tulo sa unom ka biktima gikan sa dakbayan sa Lapu-Lapu samtang tagsa sa dakbayan sa Sugbo, Bohol ug Negros Oriental.
Base sa report sa DOH-7 ug sa RESU o Regional Epidemiology and Surveillance Unit, hangtod sa alas 12 sa udto sa miaging adlaw, nakatala sila og ’slight increase’ sa ihap sa mga firecracker-related injuries tandi sa sa miaging tuig.
Ang tulo sa unom ka biktima nabuthan sa rebentador, bongalo ug piccolo; duha usab ang naigo sa kuwitis ug triangle.
Gitaho usab sa mga tinugyanan sa panglawas nga usa ka 15 anyos sa Brgy. Tisa, Cebu City ang nasamdan sa walang mata sa paggamit og rebentador niadtong bisperas sa Pasko.
(Jhon Tadlip/ JTY, photo courtesy from the net)
(Source: DOH-7)
