Hayan maangkon na sa mga benepisaryo sa Calaanan Relocation Site ang titulo sa mga yutang gitukuran sa ilang panimalay.
Kini human ang konseho sa syudad ubos ni bise mayor Kikang Uy mihatag og panugot ni mayor Oscar Moreno pagpirma sa gikinahanglang Deed of Absolute Sale tali sa mga benepisaryo sa Cagayan de Oro Resettlement and Socialized Housing Project dinha sa Calaanan, barangay Canitoan.
Mahinumduman nga ang maong proyekto gipatuman ubos sa Piso Piso Program sa dakbayan.
Niini, pinaagi sa ilang mga bayad, maangkon na sa mga benepisaryo ang titulo sa yuta timaan sa ilang hingpit nga pagpanag-iya sa gitukurang lote sa ilang mga panimalay nga kasamtangang gipanag-iyahan sa kagamhanan sa dakbayan.
Dili lang certificate of lot awards and madawat sa mga nanimuyo dinha sa Calaanan kun dili mga titulo sa yuta nga magmatuod sa ilang pagpanag-iya, pamahayag ni bise mayor Kikang Uy.
Ang ordinansa nga gipalabang sa konseho alang sa maong katuyuan gipaluyohan sa komite sa subdivision and landed estate ni konsehal Edgar Cabanlas ug komite sa pamalaod ni konsehal Ian Mark Nacaya. (Sangguniang Panlungsod – CdeO)