Moabot sa 48 ka mga closed circuit television o CCTV cameras ang giinstalar karon sa merkado sa Cogon ning syudad sa Cagayan de Oro aron pagseguro nga hapsay ug dali nga masolusyonan ang krimen nga mahitabo sa maong pinakabusy nga merkado sa syudad.
Ang balor dos milyones pesos nga kahimanan makahimo sa pag-pan, tilt ug zoom hangtud sa moabot 200 metros sa palibot sa merkado.
Si Police Col Dexter Paje, ang deputy director sa Cagayan de Oro City Police Office mibutyag nga ang maong kahimanan dako kaayog tabang sa ilang mga imbestigasyon ilabi na pagsuta sa suspetsado sa kasong kawat nga maoy uso kaayo nga panghitabo sud sa palibot.
Sa iyang kabahin, si Mayor Oscar Moreno nag-ingon nga ang maong lakang kabahin sa paningkamot sa lokal nga kagamhanan paghimo sa merkado sa Cogon ug uban mga merkado nga mahimong masaligan nga palibot.