Gibutyag ni Doctor Arvin Alejandro, ang provincial health officer sa probinsya sa Sarangani, nga mapasalamaton sila sa local health department tungod nagpabiling COVID-free ang Sarangani Province. Apan tungod giabrihan na ang mga piniling industriya, open na kini sa mga trabahante nga mga taga-Sarangani ug taga-gawas aron magpadayon ang ekonomiya ug panginabuhian, mas luwas matud pa kung ang masugata nga mga tao ang luwas usab sa mga sintomas. Mahitabo kini kung mukuha og health certificate.
Gikinahanglan ang pagkuha og medical certificate aron masiguro nga walay nasinatian nga mga sintomas. Apan dili compulsory ang pagpailalum sa Xray ug pagkuha og CBC sa dugo, depende na matud pa sa rekomendasyon sa doktor human sa physical examination kung nagduda kini sa kahimtang sa panglawas sa indibidwal.
Sa Executive Order No. 12 nga gipagawas ni Governor Steve Chiongbian Solon, tugutan lang nga makagawas kadtong importante ug emerhensya ang tuyo. Ang mga minor, senior citizen ug may balatian ang gidid-an sa paggawas tungod sa ilang sitwasyon.
Anaa sa gihapon sa community quarantine ang Sarangani Province bisan Modified General Community Quarantine (GCQ) kini maong dapat wala matud pay magkumpyansa. Gipaabot na lang karon ang resulta sa ikaupat (4th) nga swab test sa negosyante taga-General Santos City human nag-positibo kini balik sa Coronavirus. Samtang, aduna nay labing una nga nag-positibo sa COVID-19 sa katapad nga munisipyo sa Malita, Davao Occidental. Aduna puy barangay ang gi-lockdown karon sa Lambayong, Sultan Kudarat gumikan sa suspected cases.
Libre na ang pagkuha og health certificate sa tibuok Sarangani. Pwede mukuha sa lima (5) ka municipal hospital nga anaa nahimutang sa Maitum, Kiamba, Maasim, Malungon ug Glan, lakip na sa Provincial Hospital ug sa Provincial Health Office sa Alabel, apil pa ang opisina sa Department of Health nga anaa sa Sarangani, pwede pud makakuha sa pito (7) ka municipal health office.