El Naval Forces Western Mindanao (NFWM) oficialmente ya recivi del Jueves con el Marine Battalion Landing Team-1 (MBLT-1) con honores de llegada na su quartel na Estacion Naval Romulo Espaldon.
El ceremonia de honores de llegada ya encabesa si Rear Admiral Francisco Tagamolila, Jr., el comandante del NFWM, quien ya enfatiza el papel fundamental que hay hace el MBLT-1 reforzando el operaciones de seguridad na Oeste Mindanao, particularmente na ciudad de Zamboanga.
El MBLT-1 hay esta bajo’l control operacional del Joint Task Force (JTF)-Zamboanga. El mencionao batallon ya reemplaza con el MBLT-11.
“El despelgada del MBLT-1 na ciudad de Zamboanga significante hay mejora el de aton postura de defensa interna, proporcionando suporta vital con el Western Mindanao Command por medio del JTF-Zamboanga,” ya habla si Tagamolila.
“El de ila capabilidad es indispensable mientras trabajando hunto con otro agencias de gobierno y unidad de gobierno local del ciudad de Zamboanga na mantenida de paz y seguridad,” ya omenta si Tagamolila.
Si Tagamolila ya expresa su confidencia con el capabilidades de MBLT-1, notando, el JTF-Zamboanga es afortunado tener un batallon de marines bajo su commando.
Antes de asignado na ciudad de Zamboanga, el MBLT-1 ya servi na provincia del Tawi-Tawi bajo mando del 2nd Marine Brigade, donde ya hace un mision crucial na operaciones de defensa exterior. (B. Garcia)