Iinpakaammo ni Provincial Veterinarian Dr. Loida Valenzuela nga adda maysa nga agtartaraken ti baboy ditoy probinsia a natulunganda a nangala ti akreditasyon ti luganna nga agibiahe ti baboy manipud iti Ilocos Norte a maipan iti sabali a probinsia.
Imbatad na a daytoy ket maysa kadagiti addaan ti rehistro a “piggery farm” ditoy probinsia a taga Brgy. Uno ditoy siudad ti Laoag.
Inlawlawagna nga agtultuloy ti panangallukoyda kadagiti adda ti pagtaraknanda ti baboy a kabaelanda ti mangala ti “specialized vehicle” a pagkargaan ti baboy a gumatang a makatulong tapno matun-uyan ti kalikagum ni gob. Matthew Marcos Manotoc a mapagtalinaed nga ASF free ti probinsia.
Inpanamnamana a nakasagana ti opisinada a tumulong a mangala ti akreditasyon nga agibiahe ti baboy.
Kunana a babaen iti daytoy ket nasigsigurado a maiyadayo dagiti taraken a baboy iti mabalin a pannakaapektarda iti African Swine Fever wenno ASF.
Inlawlawag ni Valenzuela a saan met ngarud a mabalin a lapdan a mairuar ditoy probinsia dagiti taraken a baboy nangnangruna ket adu dagiti agkasapulan iti kabangibang a probinsia.
(Rodrigo Sadian, RPN DZRL Batac OIC)
(Source: Provincial Government of Ilocos Norte)
