Davao City – Mihangyo si Davao City Mayor Sara Duterte ngadto sa mga Dabawenyo nga dili mamili ug brand sa bakuna, inay huna-hunaon ang pandemya nga pabiling hulga matag adlaw sa katawhan nunot sa padayon nga pagsaka sa kaso sa Covid-19 ning panahuna dinhi sa dakbayan.
Dugang ni Mayor Sara nga mahinungdanon nga dunay proteksyon gikan sa kagaw ang mga Dabawenyo gumikan kay walay bisan usa nga nasayud kung kinsa ang grabi o naa sa kritikal nga nataptan sa Covid-19.
Samtang nagpahinumdum usab ang Mayor ngadto sa mga Dabawenyo nga midawat na ug bakuna nga dili usab magkampante kung asa kinahanglang pabiling igmat sa pag-amping sa kaugalingon pinaagi sa pagsunod gihapon sa gipatuman nga “minimum public health standards”.
Subay sa vaccination report sukad niadtong Setyembre 1 dinhi sa dakbayan, anaa na sa 605,434 ang midawat sa 1st dose samtang 340,050 sa second dose sa bakuna.
(Source: Davao City Information Office)