Isip tawhanon nga pagbati ug tinud-anay nga pagtabang sa mga nanginahanglan, wala magduha-duha nga mitunol sa hinabang ang kagamhanang lokal sa dakbayan sa Dapitan sa usa ka mananagat nga molupyo sa dakbayan sa Dipolog kinsa nabangalan sa laing mananagat nga taga-Sicayab Bucana sakop sa Dapitan human kini nag-utaw-utaw sulod sa duha ka oras kaniadtong Domingo sa buntag.
Ang biktima mao si Fernando G. Pagente, 55 ang panuigon, adunay kaipon ug residente sa Relocation Site Brgy. Dicayas dakbayan sa Dipolog diin paingon na unta ang gisakyan niini nga pumpboat sa payao nga nahimutang sa tunga-tungang bahin sa Sicayab ug isla sa Aliguay.
Sa pakighinabi ngadto sa biktima, sumala pa nga nianang alas 5:00 sa buntag padulong na unta siya sa payao aron managat sa dihang nabangga kini sa batang ug nabuslot ang iyang gisakyan maoy hinungdan sa pagkalunod niini.
Sa duha niya ka oras nga paglutaw sa lawod adunay usa ka mananagat nga nakabangal kaniya sa may alas 7 na sa buntag kinsa nailhan nga usa ka Roel Minojardin, 49 anyos, minyo ug nanimuyo sa Brgy. Sicayab Bucana.
Asoy pa sa asawa niini nga wala magpanuko nga mitabang ang iyang bana sa biktima pinaagi sa pagbira sa nabuslot niini nga sakayan padulong sa daplin sa baybayon.
Paghidangat sa daplin sa baybayon gitaho gilayon sa usa ka Randy Moreno residente usab sa brgy. Sicayab Bucana ngadto kang Kapitan Danilo Sardane ang mao nga insidente.
Segun pa ni Kapitan Sardane nga kon adunay mga panghitabo sa kadagatan ilabina kon malunod ila dayon kini nga ipahibalo sa City Agriculture ug wala magdugay nahidangat si City Agriculturist Cyril Patangan aron masuta ang estado sa nabangalan lakip na ang sakayan.
Wala usab magduha-duha sa paglugway og hinabang ang kagamhanang lokal diin personal nga gitunol ni Mayor Rosalina G. Jalosjos ang mga makina nga tag 6.5 HP engine lakip na ang kompletong mga kahimanan, fiber glass nga sakayan, ug pahalipay nga salapi nga gidawat sa biktima ug nakabangal nga si Roel.
Dako ang pagpasalamat sa biktima nga si Fernando sa nadawat nga bag-o nga makina ug kompleto sa himan nga pumpboat nga magamit niya sa pang-adlaw-adlaw nga panginabuhian.
Nagpasalamat usab  ang asawa sa nakabangal sa gihatag nga pahalipay nga salapi ug makina gikan sa kagamhanang lokal ilawom sa administrasyon ni Mayor “Nene” Jalosjos.
Nagpasalamat usab si Kapitan Sardane ngadto ni Mayor “Nene” ug City Agriculturist Patangan nga bisan tuod dili kini residente sa dakbayan sa Dapitan ila gihapon kini nga gitagaan sa insakto nga ayuda.
(Source: CITY INFORMATION DIVISION-CID-Dapitan Facebook page)