CAGAYAN DE ORO CITY- Giakusahan ni Cagayan de Oro City Mayor Oscar Moreno nga trabahante sa kapitolyo sa Misamis Oriental ang caller sa trending nga 8888 nga nagsumbong sa kahimtang sa syudad may kalambigitan sa Covid-19. Ang 8888 nga linya mao ang hotline number ni Presidente Rodrigo Duterte diin modawat sa mga reklamo sa katawhan.
Sa social media migula ang usa ka caller nga giilang si Bernadine Castillo nga nagreklamo batok sa local nga kagamhanan sa Cagayan de Oro nga nagsumbong sa linya sa Presidente nga kahugak nga mga lakang sa dakbayan labot na sa Covid-19 human misumbong nga nagbukas na ang dagkong malls bisan ng aduna nay gibutyag nga local transmission sa virus sa syudad.
Sa press conference niadtong Sabado Mayo 9 gibutyag sa Mayor nga usa ka trabahante sa Provincial Tourism Department sa Provincial Government nga ginganlan ug Leona Bagaipo Cabagnot, taga Zone 9, Upper Jasaan, Misamis Oriental nga nagdrama sa pagtawag sa 8888. Matud sa mayor, usa ka silingan ni Cabagnot ang nagtext kaniya. Apan hugtanon kining gihimakak ni Cabagnot. Matud niya, dako nga damage kini sa iyang pagkatawo kay dili tinuod.
Sa kabahin ni Moreno siya nag-ingon nga drama ra kadto sa kapitolyo ug pagpangdaot lamang kaniya.