Iriga City—Pinahimutikan ni alcalde Madel Yorobe Alfelor kan cuidad nin Iriga na may inaatubang na siyang kaso sa ngunian huli sa dagmang na irregularidad na nakomiter sa laog kan saiyang administrasyon.
Imbes pinag-urgulyo kaini an mga nakukuang honra kan cuidad na anas pasado sa Seal of Good Housekeeping (SGLG), pasado sa standard kan DILG, Civil Service Commission, DOH asin iba pang National Government Agencies na may superbisyon sa local na gobierno.
Lininaw kaini, na pirit sana siyang rinaraot kan saiyang mga kalaban sa politica orog na an dapit sa Emmergency Shelter Assistance (ESA) asin iba pang mga programa.
An Alcalde nangapudan pa sa saiyang mga kritiko na mag-trabaho na nguna asin may panahon O oras sa politica.
Nangapudan pa man ini nin pagtatabangan tanganing sa panahon nin pandemya pakinabangan sinda kan mga nangagaipo.
Maski dai direktang sinabi kan alcalde kun siisay an may pakana kan gabos na fake news kontra sa saiya ini mayo nin iba kundi an saiyang karibal na pamilya Villafuerte kan Camarines Sur.
Nagpahayag pa nin kamunduan an alcalde sa soboot 10 milyones pesos na ginagastos kada bulan tanganing raoton sana siya sa social media sa paagui kan mga fake account asin bareta kaining pinapaluwas.
Kabali sa mga account na pinuntariya kan Alcalde iyo an Bicol Politics asin Rinconada Secret Files.
