Cagayan de Oro – Subling naghangyo si Mayor Rolando Klarex’ Uy ngadto sa mga sa sidewalk vendors atol sa gipahigayon nga Kasalan sa Bayan’ sa Merkado sa Cogon Martes, Hulyo 9, 2024.
Si Mayor Klarex namahayag nga gihatag niya ang tanang pagsabot ngadto sa mga sidewalk vendors ilabina nga mao kini ang ilang panginabuhi ug aduna usab silay mga pangandoy sa ilang pamilya.
Apan kadaghanan kanila wala nagtuman sa kasabutan sa syudad bisan gihatagan na sila og higayon ingon man tukmang lugar ug oras aron makapamaligya nga dili makadisturbo sa publiko ilabina sa mga motorista.
Usa sa nakita sa mayor atol sa iyang paglibot sa Cogon mao ang dalan JR Borja nga napuno na usab sa mga sidewalk vendors ug nagbabag sa dalan.
Matud ni Mayor Klarex nga maghatag unta og kaangayan ang mga sidewalk vendors sa katawhan nga nahasol ug naapektuhan sa matag adlaw tungod sa ilang pagpamaligya ug pag-atang sa dalan ilabina sa pedestrian lane sa kamerkaduhan.
“Kung wala lang untay moreklamo pwedi ra nako piyong-piyongan ang balaod nga inyong gisupak,” dugang ni Mayor Klarex.
Naglaum ang mayor nga magmatinud-anon ang mga sidewalk vendors pagtuman sa iyang hangyo kay alang man kini sa ilang kaayohan nga magpadayon sa ilang pagpamaligya sa merkado sa Cogon.
News and photo courtesy of CIO CDO