Usa ka Memorandum of Agreement ang gipirmahan bag-ohay lang tali ni City Mayor Rolando “Klarex” Uy, City Civil Registrar Evangeline C. Tapangan ug Philippine Statistics Authority 10 Regional Director Janith C. Aves alayon sa pagpatuman sa Batch Request Query System (BREQS) project.
Nag-unang katuyoan sa maong proyekto nga mapadali, paspas ug haruhay ang pagkuha o’ paglukat sa civil registration papers gikan sa buhatan sa City Civil Registry.
Pinaagi sa BREQS project, dili na kinahanglan nga modalikyat o’ mobiyahe pa padulong sa city hall ang mga residente nga nanimuyo sa lagyong barangay, sanglit mahimo nang ipadala ang ilang mga requests pinaagi sa electronic submission.
Sa iyang kabahin, gidayeg ni Mayor Klarex ang bag-ong sistema ug inobasyon tungod kay makahatag kini og dakong kaharuhay ug kasayon sa mga katawhan ning syudad nga nanginahanglan og mga dokumento gikan sa Civil Registry.
Kabahin usab kini sa paningkamot sa iyang administrasyon sa pagtunol og epektibong serbisyo publiko, diin mahatagan sa kasayon ang mga katawhan ning syudad nga gustong mopahimulos sa nahisgutang serbisyo sa syudad.
News and photo courtesy of CIO CDO