Buhi, Camarines Sur – Dai nin dapat ikahandal an mga namamanwaan kan Buhi, CamSur matapos na makompirmar na yaon na sa laog kan banwaan an delta variant na mas nakaka-ulakit asin nakakagadan.
Ini an nagin pahayag kan alcalde kasabay kan pagsabi na mayo man nin mga nakasalamuha an persona na tinamaan kan virus na ngunian deklaradong fully recovered na.
Sigun sa alcalde, sarong LSI hali sa metro manila kun sain pag-abot pa sana sa del Gallego nagpositibo na sa antigen test, diretso man ini sa quarantine facility kan banwaan sa Buhi hasta sa magluwas an resulta sa swab test na positibo ini sa SARS Cov-2 na dagos naman na nagpa-rahay sa pasilidad kan banwaan.
An saiya sanang nakasalamuha iyo an mga medical personnel, alagad anas man protektado kan PPE’s hasta Agosto 21 kan presenting taon.
Sa pagluwas kan genome sequencing, tulos man na ginibo kan local na gobierno an contact tracing, mientras na may kooperasyon man an pamilya sa mga autoridad orog na sa data kaipuhan asin mga dokumentasyon na ginibo kan IMT.
Kinompirmar pa ni mayor aguinillo na mayo sa saiyang pamilya na may pinagmamati O nagka-hilang nin covid-19 kasabay kan paglaom na dagos ng nakarecover an pasyente asin mayo nin naulakitan.
Alagad mas ngunian na pinahigot an pagbabantay sa mga linderos kan Buhi, pagbabawal sa mga mayo nin face mask asin dai nagsusunod sa social distancing tanganing mas maseguro na dai na malakop pa an delta variant sa banwaan na sinambit.
 (Photo Courtesy: LGU Buhi Official Facebook page)