Iriga City – Padagos ngunian na limitado an transaksyon sa gabos na opisina sa munisipyo kan Baao, Camarines Sur. Ini kasunod kan nagdadakol na mga kaso nin covid-19 sa lado kan mga empliyados.
Ini kasunod naman kan nagin direktiba ni Alcalde Jeff Besinio tanganing padagos na mailikay an publiko asin mismo an mga nag-oopisina sa Munisipyo na maulakitan asin magkaigua nin buwelo sa regular na disinfection.
Katakod kaini, an budget office kun sain nagkaigua nin sarong close contact asin nagpositibo sa covid-19, padagos man giraray na maako nin transaksyon alagad bako sa laog kan opisina, imbes sa pinagtalaan na booth sa luwas.?
Arog man kaini an ginibo sa opisina kan planning and development mantra na padagos na magkakaigua nin skeletal force an iba pang opisina.
Inot kaini, minabuelta pa sana an opisina sa munisipyo kasu-odma, alagad igua na naman nin sarong nag-positibo, kaya ginibo kan alcalde an nasabing direktiba.
Kanselado naman an regular na meeting kan Liga ng mga Barangay ngunian na aldaw susog naman sa pinaluwas na abiso ni Liga Pres. Dante Arevalo, mientras na an pagkua nin national ID an kanselado naman ngunian sa munisipyo kan Baao, Camarines Sur. (Melvin F. Barayoga, RPN DZKI Iriga OIC)
(Source: LGU Baao, Camarines Sur)