General Santos City – Pagmonitor sa City Veterinary Office Gensan sa mga karneng baboy nga naga-sulod sa dakbayan lakip na ang mga buhing baboy,mas gipahugtan pa.
Sumala kang Dr. Emilio Gargaran, labaw sa City Vet Gensan nga hilaw man o luto nga baboy ang wala ginatugutan nga makasulod sa dakbayan, pasabot nga ginakumpiska kini sa checkpoint ug ginabubuan ug disinfectant.
Pag-angkon niya nga kung basehan ang mga nakumpiska milabayng bulan, nag-ubos gyud ang mga nakumpiska karong Disyembre kung asa siya nagtuo nga nakakat-on na ang katawhan nga bawal magpasulod ug mga karneng baboy sa dakbayan sa Gensan.
Dugang pamahayag ni Dr. Gargaran nga ang Gensan ang adunay daghan ug paigo nga supply sa karne para sa umaabot nga pasko ug bag-ong tuig.
Saysay niya nga sa Gensan, adunay napulo ka mga commercial farm ang nagasupply sa mga baboy wala pay labot niini ang naga-backyard hograising.
Samtang giklaro niya nga ang mga karne o buhing baboy gikan sa mga redzone area kon apektado sa ASF, ang wala gyud ginahatagan ug dokumento sama sa South Cotabato ug Sultan Kudarat pasabot nga ang baboy nga anaa sa maong lugar sila ra usab ang nagakonsumo niini gumikan dili nila pwedeng i-gawas o ipa-agi sa green zone sama sa Gensan.
Kalabot niini, gibutyag ni Dr. Gargaran nga ang mga karneng baboy nga ginabaligya sa merkado, ginahimong barbeque o dili ba kaha ang mga lechon baboy nga ginabaligya sa kilid sa dalan ang gina-ihaw gyud sa mga slaughter house. Kini aron masiguro nga dili infected sa ASF ang mga baboy nga ipabaligya aron i-konsumo sa katawhan.
(Source: City Veterinary Office GenSan)