Cebu City – Niabot sa atensiyon ni Lapu-Lapu City Mayor Junard Chan ang reklamo sa pipila ka mga Oponganon batok sa AV Manpower Services nga nahimutang sa GY Dela Serna Street, Barangay Poblacion nga giingong mangolekta og ₱ 350 sa ilang mga aplikante isip registration fee.
Ang maong mga aplikante gipangsaaran nga i-endorse sa kompaniya nga nang hire ug mga trabahante.
Usa sa mga mireklamo mibutyag nga sa iyang nahibaw-an mokabat na ug usa ka gatos ang mga aplikante sa maong manpower services.
Ang mga aplikante mireklamo nga pila ka semana na ang milabay wala gihapon sila tawagi ug gi ingong nakuyawan sila nga “gitabla” na ang ilang gibayad.
Kagahapon gisubay ni Chan ang ilang mga dokumento ug nasuta nga wala silay Mayor’s Permit o bisan usang permit gikan sa dakbayan.
Kini maoy rason nga daling miluwat og closure order ang mayor sa buhatan sa nahisgutang manpower services.
Gitumbok sa mga reklamante ang usa ka mahuyang nga naila sa pangalan nga “Riley” kinsa wala maabti sa ilang buhatan atol sa pag serve sa closure order.
Sa ilang pag serve kagahapon sirado ang buhatan sa AV Manpower Services ug dunay nakapaskin sa gawas nga “Company Meeting”.
“Wala ko nakauyon sa ilang binuhatan kay nakahibalo ta kung unsa kalisud ang kinabuhi karong panahon sa pandemiya, ila naman hinoong tiwasan ang atong mga kaigsuonan nga naningkamot makakita og trabaho,” kini ang reaksyon ni Chan sa maong modus.
Matod sa mayor nga dii siya mu-tolerate sa nahisgutang paagi ug naningkamot kini nga masikop ang mga nagpaluyo niini.
Iyang panawagan niadtong dunay impormasyon kalabot sa tigduma sa AV Manpower Services nga mopadala ug mensahe sa iyang Facebook Page o sa mga mosonod nga Hotline:
- 0967-220-6071
- 0916-4416-690
- 0961-806-7946
- 0961-807-7941
- 0961-729-3000
(Jhon Tadlip/JTY)
(News & photo courtesy of Lapu-Lapu City Public Information Office)