35.4 C
Manila
Friday, April 19, 2024

Mannalon A Naapektaran Iti ASF, Ipaayan Ti Gobierno Probinsial Ti Tulong

- Advertisement -

Ar-aramiden ti gobierno probinsial ti amin a kabaelanna tapno makatulong iti ibabangon dagiti kakailian a naapektaran dagiti tarakenda a baboy gapu iti African Swine Fever wenno ASF.

Napinget ti kalikagum ni Gob. Matthew J. Marcos Manotoc a maipaayan amin ti alternatibo a pamastrekan dagiti naapektaran ti ASF.

Mainaig iti daytoy, naruay a kakailian ti ili a Solsona ti naipaayan iti taraknenda a baka, karnero, kalding ken “free range chicken” ita nga aldaw.

Inpakaammo ti gobernador a tallo a mannalon idiay Brgy. Sta. Ana ken maysa a taga Brgy. Talugtog ti naipaayan ti saggaysa a baka, lima a taga Brgy. Sta. Ana ti naikkan ti taraknen a saggaysa a karnero, maysa a taga Brgy. Talugtug ken dua a taga Brgy. Juan ti naipaayan ti taraknen a saggaysa a kalding idinto a walo a taga Brgy. Sta. Ana ti naikkan pay ti sagduduapulo a “free range chicken”.

Mangnamnama ti gobernador nga in-inut a maipaayan amin dagiti addaan ti taraken a baboy a naapektaran ti ASF ti alternatibo a pamastrekan babaen iti tulong ti Provincial Veterinary Office nga idadauloan ni Dr. Loida Valenzuela.

Immun-una ngem iti daytoy, adda manen dagiti karnero, kalding ken baka a naggapo iti “livestock facility” ti PVET a naibunong kadagiti dadduma pay a naapektaran ti tarakenda a baboy iti ASF ditoy probinsia.

Malaksid iti daytoy, ikarkarigatan pay ti gobierno probinsial ti mangipaay ti “food packs” iti tunggal pamilia nga apektado iti ASF.

Segun iti gobernador, sanga gasut uppat a pulo ket maysa a pamilia manipud iti San Marcelino ken tallo manipud iti San Francisco ti naipaayan ti food packs iti ili a Dingras.

Innayonna a bayat a maiyur-uray ti tulong nga aggapo iti Departamento ti Agrikultura ket mangbirok ti wagas ti gobierno probinsial no kasano a maalay-ayan ti rigat a paspasaren dagiti maseknan nangnangruna iti daytoy a panawen ti pandemia.
(Cita Macalipis, RPN DZRL Batac Correspondent)

(Source: Provincial Government of Ilocos Norte)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -