Siyam ka tawo lakip sa usa ka abogado ug iyang igsoon nga usa ka konsehal ang nasikop sa illegal nga tari sa manok o tigbakay sa Purok 1, sityo Matnog, brgy. Putat, Tuburan, Cebu niadtong Biyernes sa udto, Enero 15.
Ang mga dinakpan nga naglakip sa municipal legal officer sa Tuburan Atty Renan Dela Cerna ug iyang igsoon Konsehal Arbello Dela Cerna gitanggong sa buhatan sa kapolisan sa Tuburan ug gitakdang pasakaan og kaso karong adlawa.
Posibleng mag-atubang ang siyam og kasong kalapasan sa Presidential Decree o PD 449 kun Cockfighting Law of 1974 as amended by Presidential Decree 1602 ug sa Section 9 (e) sa Republic Act 11332 kun Mandatory Reporting of Notifiable Diseases and Events of Public Health Concern Act ug saArticle 151 sa Revised Penal Code.
Base sa spot report, ang abogado mag-atubang usab og laing kasong criminal nga kalapasan sa Section 31 sa RA 10591 o Comprehensive Firearms and Ammunitions Regulation Act dihang nakuhaan siyag armas nga way legal authority.
Lakip sa mga ebidensiya nga nasakmit mao ang pito ka bihag, 19 ka buhing manok-igsasabong, kuwarta nga P48,410, usa ka matang sa tambal sa manok, heringgilya, nylon cord, buwang,usa ka 9mm pistol, ug ubang gambling paraphernalia.
via Jhon Tadlip/JTY
Source: Tuburan Police Station
Photo: The Net