Gimando na ni PNP-Regional Office 12 director, PB/Gen. Michael John Dubria ang makuting imbestigasyon sa pagpusil-patay kang Libungan, North Cotabato Mayor Christopher Cuan ug driver niining si Edwin Ihao.
Sa usa ka pamahayag, giasoy ni Dubria nga nakig-alayon na usab ang PRO-12 sa mga kasikbit nga regional police offices sa mas gipalapdan pa karong man-hunt operations batok sa mga suspek sa maong krimen.
Nanawagan usab ang opisyal sa mga adunay impormasyon nga pwedeng makatabang sa pagresolba sa kaso, nga gilayong makig-alayon sa mga otoridad.
Base sa inisyal nga impormasyon sa Cotabato Provincial Police Office, gikan matod pa og Davao City si Cuan ug mibisita kini sa ginapatukod nga bagong sabungan sa Brgy. Cabaruyan, sa dihang gipusil kini sa wala pa mailhing mga suspeks.
Gikanayon nga sakay sa usa ka sports utility vehicle ang mga suspek.
Kahinumduman nga tuig 2016, gi-raid sa mga otoridad ang panimalay ni Cuan gumikan sa taho nga aduna kini gihuptan nga unlicensed firearms ug sa pagkalambigit matod pa niini sa pagpayuhot sa ginadiling droga.( JOHN REY SOMIDO)