Cagayan De Oro City – Ang mga namaligyaay sa face shields sa Cagayan de Oro gisuginlan sa City Hall ug sa Department of Trade and Industry (DTI) sa pagbaligya sa ilang produkto sa price range nga ₱ 26 ngadto sa ₱ 55 lamang aron daghang mga tawo ang makapalit.
Base sa guidelines Sa DTI, ang retail prices sa face shields kinahanglan anaa lamang sa presyo nga ₱ 26-₱ 55 apil na sa sa gamay nga ginansya sa nagbaligya.
Ang face shield, wa gikinahanglan nga medical grade qualify apan ang materyales niini, kinahanglan nga tin-aw, sayon ra limpyohan ug haom nga gamiton sa komunidad, matud pa ni DTI Provincial Director Almer Masillones sa usa ka press briefing.
Samtang gidasig usab ni Masillones ang matag usa sa pagbuhat sa ilang kaugalingong faceshields nga igong makataptap sa ilang nawong. Sa iyang kabahin, si Atty. Jose Edgardo Uy nag-ingon nga ang City Hall pinaagi sa City Price Coordinating Council ug sa DTI ug uban pang stakeholders ang momonitor sa mga sellers sa face shields aron kalikayan ang overpricing sa ilang produkto kagahapon, usa ka panagtigom ang ilang gihimo alang sa maong katuyuan. Hinuon gipasabot ni Atty. Uy nga wala sila mopugong sa mga gabaligya niini nga nakaincome usab niini nga produkto apan dili usab angay tugtan ang pagsakay sa panahon pinaagi sa pag-overprice sa pagbaligya sa mga face shields.
Nasayran nga ang City Health Insurance Office ug mga departamento sa City Hall ang nabusy sa pagkakaron sa mass production sa face shields alang sa publiko. Ang petsa ug ang mode sa pagpanghatag ang wa pa mahibaloi kon kanus-a himuon. Ang gobierno nagmando sa pagpasul-ob sa face shields ilabi na sa alang sa riding public transport sugod niadtong Agosto 15. (City Information Office)