General Santos City – Ginahulat nalang sa DEPED Gensan ang preliminary investigation sa Deped Regional Office 12 human gireklamo ang usa ka magtutudlo sa North Highschool human niining gilabayan ug scotch tape ang usa ka estudyante nga anaa karon sa hospital.
Sumala kang DEPED Gensan Assistant Schools Division Superintendent Carlos Susano nga na-endorso na nila ang kopya sa reklamo ngadto sa Regional Office.
Sa karon, naghatag na matud pa ug assistance ang North Highschool ngadto sa bata human ang maong insidente.
Dugang pamahayag ni Susano nga nihatag usab ug assistance ang magtutudlo ngadto sa pamilya sa biktima.
Pagpaklaro niini nga sa kasamtangan, padayon pa nga nagatudlo ang nahisgutan sa North Highschool hangtud nga walay resulta sa imbestigasyon ug ginahulat pa ang rekomendasyon gikan sa regional office ayha maghimo ug lakang.
Saysay pa niini nga subay sa balaud, bawal gyud ang Corporal Punishment hilabina sa mga kabataan, rason nga kinahanglang imbestigahan kung unsa ang nahitabo sulod sa klase nga miresulta sa pagpanglabay ug scotch tape.
Subli man usab gipahinumduman ni Susano ang mga magtutudlo nga patas-an gyud ang pasensya ug ang pagsabot sa mga estudyante.
Likayan matud pa nga pasakitan ang mga kabataan inay tabangan nga sila makakakat-on sulod sa eskwelahan.
Makahatag matud pa ug trauma dili lang sa mga estudyante nga nadapatan kundili bisan na sa mga estudyante nga makakita rason nga kini likayan hilabina ang pagpahigayon ug corporal punishment.
(Source: DepEd Regional Office 12)