Hugot nga gikondena sa mga personahe sa Bacuag Municipal Police Station sa pagpanguna ni Chief of Police P/Capt. JUNE HONTANOSAS, ang teroristang binuhatan sa gitoohang New People’s Army (NPA) human laing inosente na usab ang ilang gipusil- samaran kagahapong adlawa (Hulyo 28) sa may alas 11:00 ang takna sa buntag didto sa bukirang bahin sa Sitio Saro, Brgy. Santo Rosario, Bacuag, Surigao del Norte.
Ang mga ginsakpan sa Bacuag Municipal Police Station gilayong naglunsad og imbestigasyon human madawat ang impormasyon. Kini uban sa pakig-alayon sa barangay officials aron maberipika ang maong insidente.
Naila ang biktima nga si RECARTE OTONG GAÑA, 36 anyos, minyo, mag-uuma, ug lumulupyo sa Brgy. Pautao, Bacuag, SDN.
Basi sa pasiunang imbestigasyon nga ang biktima didto kini sa iyang giatiman nga rubber plantation aron sa paglampas ug paghinlo apan pipila ka minuto ang milabay kalit matud pa nga mitunga ang lima (5) ka mga armadong kalalaken-an ug gustong kawaton ang iyang binuhing manok apan misukol ang biktima maoy hinungdan nga siya gipusil. Suerte nga nakalikay ang biktima ug daplis lang ang samad sa iyang liog ug sa iyang tuong kamot.
Nakaikyas ang biktima sa maong insidente samtang ang mga suspetsado misibat ngadto sa wala matino nga direksyon.
Pinaagi sa tabang nila ni Hon. Geronimo Galindo, ang Kapitan sa Brgy. Sto. Rosario ug mga Brgy. Tanod nga sila ni Mr. Dario Limosionero ug Mr. Eldie Palonpon, daling gidala ang biktima sa Caraga Regional Hospital aron kini matambalan.
Ang kapulisan nagapangita pa ug dugang impormasyon aron maila ang mga suspetsado ug mapasakahan ug kaso. (Jun Prex Salubre, Ronda 6 RPN DXKS)