Higpitan na sa Land Transportation Office (LTO-7) ang operation ug monitoring batok sa Angkas motorcycles nga gigamit sa commercial nga katuyo-an.
Gibutyag ni LTO-7 Regional Director Victor Emmanuel Caindec nga andam na sila nga mogukod sa Angkas motorbike-for-hire inabagan sa Land Transportation and Franchising and Regulatory Board (LTFRB-7). Ang desisyon labot niini gisagop sa LTO-7 ug sa LTFRB-7 nunot sa giluwatan nga Temporary Restraining Order (TRO) sa Korte Suprema nga naglibkas sa nahauna nga kasugoan sa Mandaluyong City Regional Trial Court nga nagtugot sa operation sa Angkas motorcycles.
Gitataw ni Caindec nga apil nga maigo sa ilang operations ang habal-habal nga gitawag og single transporter nga mikatap na sab pag-ayo sa Sugbo labi na sa urban centers. Ang bag-ohay pa lang usab nga nag-operate nga Grab bike apil usab nga gukdon sa LTO.
Gipasabot ni Caindec nga gipaabot pa usab nila ang memorandum gikan sa ilang central office aron maseguro nga dili managlahi ang interpretasyon sa desisyon nga giluwatan sa Korte Suprema.
Sa pikas bahin, uyon si Caindec nga adunay himoong mga kausaban sa ubang probisyon sa R.A. 4136, ang naila nga Traffic Code of the Philippines. Matud niya karaan na kaayo ang maong balaod ug angayang usbon ang ubang mga probisyon niini aron mohaom kini sa karon nga panahon.