Aprobado na ang Local Public Transport Route Plan (LPTRP) sa Cagayan de Oro ug sugdan na ang implementasyon niini sa dili madugay.
Kini ang gibutyag ni Engr. Nonito Oclarit, hepe sa Roads and Traffic and Administration (RTA), atol sa gipahigayong Northern Mindanao Road Transport Conference nga gipangulohan sa Land Transportation and Franchising Regulatory Board (LTFRB), Office of Transport Cooperative, Land Transportation Office, Cooperative Development Authority, Department of Tourism, NEDA 10, local government units sa rehiyon ug mga nagkalain-laing transport cooperatives sa Rehiyon 10.
Matud ni Engr. Oclarit aduna nay ordinansa ang LPTRP ug gihulat na lang sa syudad ang memorandum circular nga ipagawas sa LTFRB Board alang sa implementasyon niini.
Sa mensahe ni City Administrator Hilario Roy Raagas nga maoy mirepresentar ni Mayor Rolando “Klarex” Uy, iyang gipaabot ang suporta sa mayor ilabina gayud sa transport coop. nga giila niini nga usa sa mga importanteng sektor sa panerbisyo.
Gipadayag usab ni Mayor Klarex nga adunay pundo nga gigahin ang iyang administrasyon aron pagtabang sa transport coop ug sa ubang kooperatiba sa Cagayan de Oro.
Kahinumdoman nga usa ang LPTRP nga rekisitos alang sa hingpit nga pagpatuman sa PUJ Modernization Program sa nasud diin tumong niini nga mahatagan og sakto ug komportableng serbisyo ang riding public dili lamang sa Cagayan de Oro apan sa tibuok nasud.
(Source: CIO-Cagayan de Oro City)