Nanawagan karon si Cong. Maximo Rodriguez Jr. sa Segundo distrito sa syudad sa Cagayan de Oro sa usa ka balaodnon nga magdili sa pagpahigayon sa logging sa dakbayan ug sa mga watershed areas nga nagpalibot sa syudad apan dili na sakop sa teritoryo niini.
Kagahapon, gi-anunsyo ni Cong. Rodriguez nga nagpasar siya sa usa ka resolusyon nga magpadali sa iyang 2017 House Bill 4798 nga mapalabang na kon diin kini nagtinguha sa pagdili sa logging sa syudad.
Apan matud niya, ang logging ban sa Cagayan de Oro dili pa igo kay aduna pay pito ka watersheds nga nagpalibot sa syudad nga nahimutang gawas na sa political boundary sa dakbayan. Tungod niini, mas lisod kining dumalahon gumikan sa maong sitwasyon, matud ni Cong. Rodriguez.
Nasayran nga adunay pito ka watersheds sa mga Munisipyo sa Libona, Talakag, Baungon nga sakop sa Bukidnon nga aduna pay sakop sa Lanao del Norte.
Mao nga nagtoo ang magbabalaod nga usa ka National Legislation ang gikinahanglan aron magarantiya ang rehabilitasyon ug preservation sa watersheds.
Nagtuo si Cong. Rodriguez nga ang pagtinabangay sa nagkalain-laing stakeholders sama sa Integrated Social Forestry program benefeciaries ug community based forest management holders dakog tabang alang niini nga tinguha.
Dinhi sa Cagayan de Oro, hilabihan na Kabug-at sa kadaot ang nahiaguman dala sa logging.
Gidungog pa sa Kongresista nga ang logging ban adunay epekto diha sa komunidad sa papel niini pag preserve ug pagprotect sa watersheds.