Balik na ang operasyon ug trabaho sa General Santos City-Sangguniang Panlungsod karong adlaw’ng Huwebes, March 25, human sa gipatumang lockdown.
Hinuon, subay sa gipagawas nga bagong abiso, nagpabiling suspendido gihapon ang pagpahigayon og committee hearings ug consultative meetings sa mga konsehal hangtud sa adlaw’ng Biyernes, March 26.
Kahinudmuman nga unang nagdesisyon si SP presiding officer, Vice Mayor Ton Acharon nga ipatuman sa lockdown ang hawanan sa konseho, human misaka na sa tulo ka mga konsehal ang kasamtangang active Covid-19 patients.
Kini silang city councilors Richard Atendido, Vandyke Congson ug ex-officio member John Salvador Demdam.
Gawas pa niini, boluntaryo usab nga mipailawom quarantine ang ubang mga konsehal aron malikayan ang posibleng pagkatap sa virus. (John Rey Somido)