Maiyalud-ud ti lockdown iti intero a Sitio Dungtal iti Brgy. 23 ken iti aglawlawna pakairaman pay ti dua a sitio.
Daytoy ket gapu iti panagpositibo pay ti duapulo ket maysa a residente kalpasan iti pannaka-iwayat ti mass testing kadagiti innem a pulo ket maysa a residente a nakapulapol dagiti immun-unan a nagpositibo ti virus partikular kenni IN-C134, a maysa a buko vendor. Dagiti nagpositibo ket agkakabbalay ken agkakaarruba.
Insigida met a naipanda kadagiti quarantine facilities iti syudad ken naipasigurado iti pannakaipaay dagiti pagkasapulanda.
Inlawlawag ni Mayor Michael Marcos keon a masapul ti pannakayalud-od ti lockdown tapno malappedan iti panagwaras ti virus.
Ti pagmayatanna kunana, al-alistodanan a madeterminar dagiti apektado ti virus gapu ta agkakabbalay ken agkakaarruba dagiti biktima.
Malaksid dayta, mangiwayatda pay ti nayon a mandatory swab test kadagiti madeterminar dagiti contact tracers a nakapulpulapol dagiti nagpositbo.
Inbatad met ni Laoag City PNP Chief Rafael Lero adda payen ti nayon a pulis a tumulong a mangbantay kadagiti pagruaran ken pagserkan kadagiti na-lockdown a lugar tapno awan ti makaruar ken makastrek. Adda payen dagiti maipan a barikada.
Maipatungpal met ti curfew kadagiti apektado a lugar manipud alas siyete ti rabii aginggana iti alas singko ti bigat.
Inpasigurado ti mayor iti pannakaited ti pagkasapulan dagiti residente kas koma ti relief goods ken adda dagiti napusgan a tao nga aggatang kadagiti masapul dagiti residente tapno saandan a rumrummuar.
Dinawat met ni Barangay Chairman Jay Ramos kadagiti kabarangayanna a na-lockdown iti panagan-anusda gapu ta pagsay-atan dagiti kaaduan ti masapul a maipangpangruna.
Immapela met ni Dr. Norman Rabago, ti mangidadaulo ti contact tracing ti Task Force salun-at ti gobyerno probinsyal kadagiti nakapulpulapol dagiti nagpositibo ti covid-19 nga ipakaammo da laeng kadakuada tapno matulunganda ida amangan ta positibo dagitoy iti virus.
(OIC Rod G. Sadian, RPN DZRL Batac)
(Source: LGU Laoag City)