Iriga City – Dagos ng hinali ni Alcalde Fernando Simbulan kan Nabua, Camarines Sur an lockdown sa opisina kan MDRRMO sa sinambit ng banwaan matapos na mag-negatibo sa RT-PCR swab test an gabos na mga empliyado kan sinambit ng opisina.
Katakod kaini, nagpahayag nin pasasalamat an alcalde sa satuyang kagurangnan sa magayon na resulta kan swab test sa mga empliyados na nagin close contact kan sarong nurse na nainot ng positibo sa hilang na Covid-19.
Alagad, padagos na nangapudan si Simbulan sa gabos na namamanwaan na magsunod sa minimum health protocol na ipinapasunod kan IATF asin kan DOH nganing maka-ibitar sa kinakatakutan na hilang.
Mientras tanto, tinapos naman ni Alcalde Jeff Besenio asin Besi Alcalde Jose “ling” Malazarte kan Baao an self-quarantine sa gabos na miembros kan Sangguniang Bayan na nagdurar nin sarong semana.
Kasu-odma nagkaigua na nin virtual session an sangguniang bayan, asin tulos na tinukar an mga importanting bagay orog na an dapit sa covid response asin an pag-responde sa hilang kan mga orig na ASF.
Magigirumduman na pinag lockdown an sangguniang bayan kan Baao matapos na an saro sa saindang kaibahan magkaigua nin close contact sa pamangkin kaini na inot naman na nagpositibo sa Covid-19. (OIC Melvin Barayoga, RPN DZKI Iriga)
(Source: LGU Baao and LGU Nabua Camarines Sur)