GITUTOKAN sa Local School Board (LSB) ang paghatag dugang suporta sa mga nidaog sa milabayng 1st Regional Protect Our Nation’s Youth (PONY) Baseball and Softball Competition sa Mindanao.
Kini human gitakdang modula ang mga players sa Misamis Oriental didto sa Ilocos, Manila, Indonesia, Taiwan ug China.
Usa sa gisiguro sa LSB nga mahataga’g dugang budget ang mga players sa ilang pagbyahe.
Matod ni PONY Coach Christine Salcedo nga dako’g tabang kini kanila aron mahatagan sila’g oportunidad nga makadula lakip sa gawas sa lalawigan.
Gidugang niini nga usa kini ka oportunidad nga mapalambo ang ilang kahanas ug makahatag inspirasyon sa ubang bata aron malikay sa bisyo.
Ang mga players nag gikan sa Jasaan, Salay, Medina, ug Magsaysay.
Gipasalig ni Provincial Administrator John Venice Ladaga nga mahataga’g daling aksyon ang ilang gihangyo nga suporta. Ug gituohang garbo kini nga mu-representar ang Misamis Oriental sa ubang nasod.
Kahinumdomang gipahigayon ang 1st PONY Mindanao League – Baseball & Softball tournament sa Medina nga gisalmotan sa nagkalain-laing probinsya sa Mindanao.