Davao del Norte: Gipulong ni Kuya Gov. Edwin I. Jubahib ang mga mayores ug mga opisyales sa kapulisan ug kasundaluhan sa Davao del Norte, aron hisgutan ang pagpatuman sa iyang gipakanaog nga Executive Order No. 40, nga mipailawom sa tibuok Lalawigan sa Davao del Norte ubos sa General Community Quarantine (GCQ).
Kusganong giawhag sa gobernador ang pagpadayon sa striktong implementsyon sa quarantine protocols ug preventive measures, ilabi na kay daghan na nga mga establisimento ang giablihan. Mimando siya sa hugtanon nga pagsunod sa mga guidelines sa EO 40, aron magpabilin nga luwas ang katawhang Dabaonon sa COVID 19.
Apil niini ang padayong checkpoints, curfew, quarantine protocols, disinfection, pagbawal sa tapok-tapok, social distancing ug uban pang control measures.
Nahisgutan sab ang pag-dissolve sa pipila ka mga inter-LGU checkpoints aron lig-onon ang mga checkpoint sa provincial borders, pagbawal sa pagsulod sa mga tawo gikan sa mga lugar nga taas og kaso sa COVID-19, suporta alang sa mga frontliners, polisiya sa mga biyahe sa sulod ug pasulod sa probinsya, ug daghan pang uban.
Giawhag ni Kuya Gov ang tanan sa pagbinantayon ug motuman jud sa mga guidelines, ilabi na kay hangtud karon wala pay tambal ang maong makamatay nga sakit.