Cebu City – Gipangandaman na sa taga Lapu-Lapu nga si Cleevan Kayne Alegres nga motuyok paglangoy libot sa tibuok isla sa Mactan nga naglakip sa Cordova.
Kini nunot sa kalamposan sa 25 anyos nga open-water swimmer paglangoy tuyok sa isla sa Olango sulod sa 12 oras.
Base sa iyang post sa Facebook, si Mayor Junard “Ahong” Chan mitug-an nga nagsugod si Alegres paglangoy gikan sa Sta. Rosa port alas 3:30 sa hapon niadtong Domingo ug nahuman alas 3:30 na sa kaadlawon gahapon.
Apan segun sa record ni Alegres, nahuman niya ang paglangoy sa 25, 420 ka metro nga gilay-on sudlang sa siyam ka oras, 59 minutos ug 48 segundos.
Nagpasalamat si Alegres sa matag usa nga misuporta kaniya, sa iyang paglangoy libot sa Olango island.
Samtang si Chan garbo kaayo sa kalamposan sa Oponganong manlalangoy.
Alang ni Chan, maisip kining kadaogan ni Alegres kinsa nangandam na usab paglangoy libot sa Mactan Island karong Abril 24.
Suma pa ni Chan, gihimo kini ni Alegres agig yukbo ni Datu Lapu-Lapu subay sa umaabot kasaulogan sa ika-500 nga anibersaryo sa Kadaogan sa Mactan karong Abril 27.
Tinguha usab ni Alegres nga ipatugbaw ang kabana bahin sa kahinungdanon sa recycling aron masalbar ang kadagatan sa plastic pollution.
Atol sa katugnaw sa kagabhion sa paglangoy ni Alegres misantop sa iyang huna-huna.
“I suddenly thought of a nickname while swimming in the darkness of the island’s tip…the LITTE MERMAN, matod ni Alegres sa iyang post script. (Jhon Tadlip/JTY)
(Source: Junard Chan, photos courtesy by Cleevan Kayne Alegres | Cebu Open Water Swimming | Garmin | Ra Castillo Tolero)