Cebu City- Nag-atubang na og kasong murder ang lima ka kawani sa 180 Degrees Rehabilitation Center sa brgy.Pagsabungan, Mandaue City tungod sa giingong pagpatay sa usa ka pasyente sa pasilidad niadtong Enero 7.
Ang murder case batok nila ni Nolie Dolotina, Limuel Noval, Johane Cabatingin, Felix Algura Jr. ug Rommel Lloyd Fortich gisang-at niadtong Huwebes.
Sa sayo pa, ang tagduma sa pasilidad miingon nga si Julius James Sison namatay sa pagkahagbong gikan sa ikaduhang andana sa bilding apan nasuta nga nakabaton si Sison og daghang bun-og, black eye ug samad sa bitiis.
Apan matod ni Cpl. Glenn Bordalba, dihang migawas ang resulta sa autopsy, nasuta nga namatay si Sison tungod sa gitawag og blunt traumatic injury sa tiyan.
Ang pamahayag sa mga saksi nagbutyag nga si Sison gikulata sa mga respondents.
Una niini, giingong nanghasi si Sison gamit ang tinalin sang toothbrush ug midemanda nga pagawson siya sa pasilidad.
Tungod niini, gikulata ang biktima sa lima ka sakop sa rehab center dihang naglisod sila pagpakalma kang Sison.
Ang kapolisan wala maka kuha og bisan unsang footage sa security camera sa pasilidad kay matod pa sa manedyer, nabuak ug nadaot sukad niadtong Disyembre. l via Jhon Tadlip/JTY
Source: Mandaue City Police Office
Photo: Contributed photo
