GIPAABOT ni Senator Cynthia Villar iyang pagdayeg sa liderato ni Gobernador Bambi Emano labina sa pagpalambo niini sa sektor sa Agrikultura sa Misamis Oriental nga dako og tabang sa nasud sa Pilipinas.
“I commend Governor Bambi Emano for his continued support of improving our agriculture sector through this newly launched Agricultural Development Complex,” mensahe ni Senator Villar atol mismo sa makasaysayanon nga paglusad niadtong Biyernes, Enero 22, 2021 sa labing dako nga Misamis Oriental Agricultural Development Complex nga nahimutang sa Brgy. Ane-i, lungsod sa Claveria.
Malaumon ang Senador nga unta ang paglusad niini nga complex mas makapalig-on pa sa farm production sa mga mag-uuma hilabina gyud kon adunay susama sa abilidad ni Governor Bambi nga moserbisyo.
“I hope this will further strenghten value change and linkages to farm production with people in service like Governor Bambi the path to a better Philippine Agricultrue maybe long but surely possible,’ dugang sa Senadora.
Gilauman sab niini nga makatabang sa kalisod sa mga mag-uuma ang paglusad niini, mahimong farm school, adunay rice competitiveness enhancement ug seed equipment trainings ug maka-avail og loans.
Malipayon usab niining gipahibalo nga hapit na nga mahimong balaod ang Coconut Levy trust fund nga pasado na sa Senado ug kulang na lamang ang pirma niini ni Presidente Rodrigo Duterte.
Gipadangat ni Senator Villar nga kung hingpit na kining mapirmahan sa Presidente dakong kaarangan labina ngadto sa mga coconut farmers ang maong balaodnon gumikan dako nga pundo ang gigahin matag tuig alang sa mga mag-uuma lakip na ang replanting sa mga hybrid nga mga lubi, pundo alang sa farm to market roads, scholarship program alang sa mga anak sa mga mag-uuma ug uban pa nga benepisyo.
Haom usab kaayo kini nga balaod labina nga dungan sa paglusad sa Agricultural Complex dinhi sa lalawigan mao ang pagbukas sa oportunidad nga mapaspasan ang produksyon sa lubi.
Dakong kalamposan sa liderato ni Gobernador Bambi nga bisan og katapusan na niya nga termino iyang gisugdan nga maplastar og maayo ang sektor sa Agrikultura sa lalawigan kay nasayod kini nga magbunga ang iyang mga pagpaningkamot nga maugmad ang abilidad sa mga mag-uuma ug molambo ang ilang tagsa-tagsa ka mga panginabuhian. (PIO-MisOr)